Ilwazeli lihlanganiselwe ukulekelela wena nawenza isibawo sokusizwa ngemali yi-NA. Ikomba yalokhu iphathelene kwaphela nokusekelwa ngeemali kwamaphrojekthi.
Ngubani Olungele Ukusizwa Ngeemali
Abantu ngamunye ngamunye, iinqhema zomphakathi, iinjamiso kunye namakhamphani boke bakulungele ukubawa ukusizwa ngeemali yi-NAC. Ungabawa ukusizwa ngemali kilamakoro wobukghwari alandelako : ZeSino, zokuGida / zokuThiywa kweGido, zokuTlola/zemiTlolo, zokuVuma nezeThiyetha yokuVuma, zeThiyetha/zedrama, zeFundonengi kunye nezoBukghwari obuBukelwako. Iinhlangano, iinjamiso neenqhema kufuze bona zirejisrawe ngokusemthethweni nangokuhlelekileko. Abafakiimbawo kufuze bona babe babantu abakhulu ngokomthetho, begodu kufuze bona babe maSewula Afrika.
Abantu Ngamunye Ngamunye
Isibawo sabantu ngamunye ngamunye ngesomfakisibawo oyedwa othoma iphrojekthi. Abakho abanye abantu ekufuze bona basebenze ephrojekhthini le ngaphandle komuntu loyo kwaphela. Lokhu-ke kwenzelelwe ukusiza abatloli bemidlalo ngamunye ngamunye, nabathiyi begido ngamunye ngamunye, nabathiyi beengoma ngamunye ngamunye kunye neengwali ngasinye ngasinye.
Ihlangano
Ihlangano itjho isijamiso esirejistariweko esinabantu abasebenza ndawonye.
Ukusekelwa Kwephrojekthi Ngeemali
Tjheja bona I-NAC kungenzeka bona ingakghoni ukusekela ngayo yoke imali efunakala ephrojekthini. Ngalokho-ke uyeleliswa ufune isizo leemali nakeminye imithombo. Ngokuvamileko nakusizwa ngeemali kusizwa amahlelo aphathelene nemisebenzi yobukghwari. Amakhotheyitjhini weendleko kufuze bona aphekelele iforomu lesibawo, kanti-ke abafaki beembawo KUFUZILE NAKANJANI bayiveze yoke eminye imithombo yabo yeemali. Isikhathi eside khulu sokuraga iphrojekthi ziinyanga ezilitjhuminambili. Kufuze kukhulunyelwe nenye imali, eli-15 % yeendleko zoburhiyarhiya bokuphatha. Amaphrojekthi asekelwa ngeemali kanye emnyakeni weemali munye. Zoke iimbawo kufuze bona zenziwe ngamaforomu we-NAC asemthethweni. Amaphrojekthi kufuze bona anzinze adresini etjhiwo eforomini lesibawo. Nakube kuba namatjhuguluko enzekako nge-adresi, kufuze bona amatjhuguluko lawo abikelwe ama-ofisi we-NAC kungakapheli amalanga ali-7.
Amaphrojekthi WezamaVakatjho
Iimbawo zamavakatjho zizakutjhejwa kwaphela nakube ivakatjho eliphakanyiswako kunelitho elizakusiza ngalo ekhamphanini namkha esiqhemeni, begodu nakube lingezelela ubungcono epilweni yamaSewula Afrika. Abafakiimbawo abamenyelwe ukuyokuvuma, ukuyokugida, ukuyokugwala namkha ukuyokwenza nanyana ngimuphi umsebenzi wobukghwari kamanye amazwe kufuze kube nendledlana amazwe abawavakatjhelako abasekela ngawo ngeemali namkha kube nendledlana iinhlangano abazivakatjhelako ezibasekela ngazo ngeemali. Ilizwe la kuvakatjhela khona umfakisibawo kufuze bona lithumele ubufakazi bokuthi lizakubhadalela iindleko ezinjengamahlalo, ukudla, iimadlana ezinande zisetjenziswa wokemalanga kunye neendleko zokukhamba/zendlela ngaphakathi kwalo ilizwelo. Nakube umfakisibawo uvakatjhela ihlangano, nayo ihlangano leyo kufuze yenze soneso. Isibawo esithunyelwa kwa-NAC kufuze siphekelelwe nanga sivumelwano sokwenza umsebenzi owenziwa mfakisibawo loyo, kungaba kugida, kungaba kuvuma, kungaba kugwala njalo njalo. I-NAC angeze iziqalelele iimbawo zokuya phetjheya nakube amaphepha afunekako ayikaniklwa wona. Kikho koke i-NAC ayikwazi ukuthi kube ngiyo yodwa esekela ngeemali. Ngaphezu kwalokho, i-NAC inalo ilungelo lokubaphekelela emakhambeni wabo abafakiimbawo ababawa ukusizwa ngeemali zokuyokuvakatjha emazweni ngamazwe.
Imifundalize
Ukusekela Ngeemali EliZweni LoKe
Kunemihlobo emibili yokusekela ngeemali: iImali yokusiza enikelwa iziko lefundo linye isetjenziselwe abafundi abanengi abasafundela iziqu zokuthoma, bese kuba khona nemali ekusizwa ngayo abafundi ngamunye eemfundweni zeziqu eziphakemeko.
Umfundalize Onikelwa Iziko Lefundo
Lapha iimbawo zithunyelwa ngokuthunyelwa eenkhulwini ezingamele iminyango eziko lefundo. Ingcenye ekulu yemali eyabelwe ukusiza kufuze bona kube ngileyo enikelwa iziko lefundo linye isetjenziselwe abafundi abanengi.
Iziqu Eziphakemeko Zomfundi Ngamunye
Iziquq eziphakemeko zizakusekelwa ngeemali kanye nje kwaphela, zisekelelwa ukusiza umfundi ukuqeda iimfundo zakhe.
Ukusekela Ngeemali Emazweni Ngamazwe:
I-NAC isekela iimfundo zamazwe ngamazwe ngeemali ezingeni leziqu zokuthoma kunye nezingeni leziqu eziphakemeko. Iimbawezi zingavunywa nakube iimfundwezo azifundiswa ngaphakathi kwelizwe leSewula Afrika. Isibawo kufuze bona siphekelelwe bufakazi obufakazela ukuthi nangambala umfundi loyo wamukelwe la athi ufuna ukuyokufunda khona njengoba abawa ukusizwa ngeemali nje. I-NAC akuzukuba ngiyo yodwa esekela ngeemali.
Ukusekelwa Ngeemali Kweenkhamphani
UNgqongqotjhe wezobuKghwari namaSiko uvumela ukusekelwa ngeemali kweenkhamphani zobukghwari ezithileko ngesikhathi esiminyaka emithathu. Umnqopho wokusekela iinkhamphani ngeemali kunzinzisa iinkhamphani eziphathelene nezobukghwari, nokukghonakalisa ukutlanywa kwemisebenzi emitjha kunye nokuvulela abavumi, abagidi, iingwali njalo njalo amathuba wemisebenzi Ukusekelwa ngeemalokhu kulungele iinkhamphani zobukghwari ezirejistariweko. Abafakiimbawo bamenywa qho ngeminyaka emithathu. Lomhlobo wokusekela ngeemali wenzelelwe iinkhamphani zobukghwari esele zizakhele igama. Abafakiimbawo kufuze bona babe namaphepha / nemitlolo nasi elandelako : umtlolo ohlathulula ubunjalo bekhamphani, umtlolo womtlamo womsebenzi oragwa yikhamphani sekubalwe nehlelo labosobukghwari, iintatimende zeemali ezihloliweko, isijamiso sezokuphatha kunye nesebhodi sekhamphani leyo.
Amakoro Esingawasekeliko Ngeemali
Iindleko zokuraga ibhizinisi, ukusekelela ukuphemba ihlelo, umthangalasisekelo, iphaliswano lokuqopha, ukuthenga iinsetjenziswa zokuvuma, amakhwaya wamasonto, ukudizayina I-webhusayidi, ukuba ngusomkhaya webhusayidi, ukuhlobisa kwangekhaya, imisebenzi yokutlama imakho, imisebenzi yokuhlela iminyanya, aabakhwezeleli kunye neenqhema zesikhatjhana.
Ukukhambisana Nezokuphatha
Abafakiimbawo kufuneka bathumele yoke imitlolo neembawo zabo. Iimbawo ezifeksiweko, ezingakatlikitlwa, ezithunyelwe nge-imeyili kunye nalezo ezingakapheleli angeze zitjhejwe. Nakungilezo ezingakapheleli zona angeze ziqalwe nokuqala.
Amalanga Wokuvala Weembawo
Amalanga wokuvala weembawo amenyezelwa emaphephandabeni angamakhulu welizwe loke kunye nakuwebhusayidi ye-NAC. Iimbawo ezizakkufika ngemva kwesikhathi kunye nalezo ezizakufika zingakapheleli angeze zitjhejwe, kodwa zizakudluliselwa esikhathini esizako sesekelo leemali. I-NAC inelungelo lokusivuma / lokusala isibawo.
Ilungelo ngamalungelo: I-NAC inelungelo lokukhupha nokwaba iimali ngokuqalelela lokho ekufuze kutjhejwe ntanzi ehlelweni le-NAC. Lokhu-ke akuliyani nalungel;o lomthethosisekelo lomfakisibawo nanyana ngimuphi. Akunamfakisibawo othola ilungelo lokusizwa ngeemali ngokwenza kwakhe isibawo nje kwaphela; yoke imali ekusekelwa ngayo iphuma ngokubona kwe-NAC.
Ukubuza Nelwazi
